புதன், 3 மே, 2017

சித்திரைப் புத்தாண்டு - கவிதைப் போட்டியில் பங்கெடுத்தாச்சா?

இந்தியாவில தமிழ்நாட்டில சித்திரை வெயிலைக் 'கத்திரி வெயில்' என்பார்கள். ஈழத்தில சித்திரை வெயிலைக் 'காண்டாவனம்' என்றும் காண்டாவனத்தில நெருப்புக் கொழுத்திற (நெருப்புக் கொழுத்தினால் வெளிப்படும் வெப்பம்) வெயில் என்பார்கள். அதாவது, பகலவன் (சூரியன்) தமிழ்நாட்டிற்கும் ஈழத்திற்கும் மேலிருந்து பூமியை நோக்குவதால் தான் இந்நிலை ஏற்படுகிறது. இந்தச் சமகாலச் சூழலை வைத்து 'ஊற்று' வலையுலக எழுத்தாளர்கள் மன்றம் சித்திரைப் புத்தாண்டை ஒட்டி கவிதைப் போட்டி நடாத்துவதாக அறிவித்திருந்தது. போட்டி இறுதி நாள் 10/05/2017, இன்னும் பங்கெடுக்காதோர் இன்றே பங்கெடுக்க வாருங்கள்.


என்னாது.....?
இந்தச் சமகாலச் சூழலை வைத்து கவிதை எழுத முடியாதா?
ஏன் முடியாது?

அம்பாள் நகர் வீதியிலே
அம்பிகா போன்ற அழகிகள்
துள்ளித் திரிவதைப் பார்த்தால்
'கத்திரி வெயில்' காலத்தில
"காலணி இன்றி நடை போடலாமா?" என்று
எண்ணிப் பார்க்க வைக்கிறதே!

கண்ணால் கண்ட காட்சியும் எம்மில் எழுந்த கேள்வியும் இணைய இப்படிக் கவிதை நடை போலக் கிறுக்க முடியாதா? இன்னும் எத்தனை எத்தனை வரிகள் எழுதலாம் பாருங்க...

என்னங்க... இஞ்சாருங்கோ...
யாழ்பாவாணனை பாருங்க...
பத்து மாதப் பிள்ளைத்தாச்சி
வயிற்றைப் போல - தனது
பானை வயிற்றைக் காட்டித் திரியிறாரே!
மேற்சட்டை ஏதும் போடாமலே...
பகலவன் வாட்டி வதைக்க
மேற்சட்டை போட்டால்
வியர்வையால் குளிக்க வேண்டி வருமெனன
அஞ்சியே அப்படித் திரியிறாரே!

சரி! இப்படி எழுத முனையாட்டி, கீழுள்ளவாறு எழுத முனைந்து பாருங்களேன்.

அங்கே பாரு...
உடையை உலர்த்த வெயிலிருக்கு
உடையைக் கழுவ தண்ணீரில்லையே
என்றழுவது சலவைத் தொழிலாளியே!
இங்கே பாரு...
பகலவன் (சூரியன்) வெறித்துப் பார்க்க
பூமித் தண்ணீர் வற்றிப் போக
"நட்ட பயிரு வாடுது
வெட்ட வெளி வயலில
தண்ணீரின்றியே..." என்று
வேழாண்மை செய்வோர் அழுகின்றார்!

சரி! இப்படி எழுத முனையாட்டி, கீழுள்ளவாறு எழுத முனைந்து பாருங்களேன்.

"என்னடி - உன்ர ஆள்
முற்றத்தில தட்டுக் காய விடுறாரு?"
"அவருக்குக் கறி சரியில்லையாமடி
வெயிலில தட்டுக் காய்ந்ததும்
முட்டை பொரிக்கப் போறாராமடி"
சித்திரை வெயில் வாட்டுது
பொண்ணுகள் இப்படிப் பேசுறாங்க!

முயன்றால் முடியாதது ஒன்றுமில்லை!
முயலுங்கள்...
சமகாலச் சூழலை வைத்து
நிறையக் கவிதை எழுதலாம் பாருங்கோ...
அப்ப, கவிதை எழுதத் தொடங்கியாச்சா...?

இப்ப, கிழுள்ள இணைப்பைச் சொடுக்கிப் போட்டி ஒழுங்கு முறைகளை படித்த பின், உங்கள் கவிதைகளை அனுப்பி வையுங்க பார்ப்போம். இறுதி நாள் 10/05/2017, இன்னும் பங்கெடுக்காதோர் இன்றே பங்கெடுக்க வாருங்கள்.

வியாழன், 13 ஏப்ரல், 2017

ஊற்று வலையுலக எழுத்தாளர்கள் மன்றத்தினால் நடத்தும் உலகம் தழுவிய மாபெரும் கவிதைப் போட்டிக்கு அழைக்கிறோம்… வாருங்கள்… வாருங்கள்


கவிதைகள் சமர்ப்பிக்க வேண்டிய காலம் 14-04-2017தொடக்கம்10-05-2017 
இந்த வலையுலகில் தாங்கள் சாதனைகளை படைக்க வேண்டும் என்ற எண்ண துணிச்சலுடன் இதுவரைக்கும் பல போட்டிகள் நடத்தியுள்ளேன்
மற்றவர்களுகடன் போட்டி போட்டு உங்களின் ஆக்கங்களை எழுதி கவிதைக்கான

தலைப்பு -(சித்திரை வெயில் வாட்டுதே.)


போட்டிக்கான நெறிமுறைகள்

1.கொடுக்கப்பட்டுள்ள தலைப்புக்கு  20வரிகளுக்கு மிகாமல் 
எழுத வேண்டும்.(புதுக்கவிதையாகவும் அல்லது மரபுக்கவிதையாகவும் இருக்கலாம்)

2.மதிப்பெண்கள் வழங்கப்படும். கவிதைக்கு கூடிய மதிப்பெண்பெறும் வெற்றியாளர் தோ்வு செய்யப்படுவார்.

3போட்டிக்கான கவிதையை தங்கள் வலைப்பூவில் தறவேற்றம் செய்யக் கூடாது போட்டிக்கான கவிதைகள் அத்தனையும் ஊற்று வலைத்தளத்தில் மட்டுமே தறவேற்றம் செய்யப்படும்.

4.மின்னஞ்சல் வழியாக மட்டுமே அனைவரும் அனுப்பவேண்டும் இரவு 12 மணிக்குள் 
(இலங்கை நேரப்படி  ) கவிதையை சமர்ப்பிக்கவேண்டும்

5.நடுவர்களின் தீர்ப்பே இறுதியானது

6.மொழிபெயர்ப்பு, முன்னரே வெளிவந்தவை, தழுவல், ஏற்கப்படாது.

8.கலந்து கொள்பவர்கள் பெயர், மின்னஞ்சல் தொலைபேசி இலக்கம் வலைத்தள முகவரி இருந்தால் ஆகிய குறிப்புகளைத் தரவேண்டும்

9. PDF வடிவில் கவிதைகளை அனுப்பவேண்டாம் ஏற்றுக் கொள்ளப்படமாட்டது
10. மின்னஞ்சலில் தட்டச்சு செய்து அனுப்பலாம் அல்லது(WORD) பயிலாக அனுப்பலாம்
11.போட்டிக்கான கவிதை அனுப்பவேண்டிய மின்னஞ்சல் முகவரி 
ootru2@gmail.com

முதல் பரிசு, -பதக்கம்.வெற்றிச்சான்றிதழ்
இரண்டாம் பரிசு, -பதக்கம்.வெற்றிச்சான்றிதழ்
மூன்றாம் பரிசு-பதக்கம் +வெற்றிச்சான்றிதழ்
(பதக்கம் .சான்றிதழ் அஞ்சல் வழியாக அனுப்பப்படும்)

நான்கு(04)ஆறுதல் பரிசுகள் (சான்றிதழ்,மட்டும் அஞ்சல் வழியாக அனுப்பப்படும்) 
பெருவாரியானஎண்ணிக்கையில் பங்கெடுத்துக்கொண்டு தமிழ்வளர்க்க வாரீர் ஏதும் சந்தேகம் இருப்பின் தொடர்புகொள்ளவேன்டிய மின்னஞ்சல் முகவரி இதோ-  
ootru2@gmail.com

முன்பு நடைபெற்ற போட்டியில் பங்கு பற்றியவர்களுக்கான பரிசுகள் அனுப்பிவைக்கப்பட்டுள்ளது… கிடைத்தவுடன் மின்னஞ்சல் செய்யவும்
-நன்றி-
ஊற்று வலையுலக எழுத்தாளர்கள் மன்றத்தின் அமைப்பாளர்

-கவிஞர்..ரூபன்-

திங்கள், 27 ஜூன், 2016

புதிய ஊற்று - வலைத்திரட்டி விரைவில் வெளிவரும்

இனிய எங்கள் வலையுறவுகளே!
வலைப்பூக்களில் புதிய பதிவுகள் பதியப்பட்டதும் வலைத்திரட்டிகள் ஊடாகப் பரப்புகிறோம். அவ்வகையில் இயங்கி வந்த பல வலைத்திரட்டிகள் இன்று செயலிழந்து விட்டன. ஆயினும், ஊற்று - வலைத்திரட்டி உங்கள் வலைப்பதிவுகளைத் தானியங்கி முறையில் சுடச் சுடத் திரட்டி வழங்கியது. ஊற்று முயன்று வெளிப்படுத்திய திரட்டியில் சில குறைகளும் இருக்கத்தான் செய்தது. அதனைச் சுட்டிக் காட்டிய நட்புகளுக்கு எமது நன்றி.

ஊற்று - வலைத்திரட்டியின் முதற் பதிப்பில் சிறு மாற்றம் (அழகுபடுத்தி) செய்து கீழ்வரும் இணைப்பில் பேணுகிறோம்.

ஊற்று - வலைத்திரட்டியின் இரண்டாம் பதிப்பில் வெளியீட்டு விரிப்பில் மாற்றம் செய்து பார்வைக்கு இலகுபடுத்திக் கீழ்வரும் இணைப்பில் பேணுகிறோம்.

ஊற்று - வலைத்திரட்டியின் மூன்றாம் பதிப்புப் பல வசதிகள் கொண்ட சிறப்பு வலைத்திரட்டியாக வெளிவர இருக்கிறது. அதுவும் தானியங்கி முறையில் புதிய பதிவுகளைச் சுடச் சுடத் திரட்டி வழங்கும் என்பதனைத் தெரிவிக்கின்றோம்.

இனிய எங்கள் வலையுறவுகளே!
எமது முயற்சிகள் வெற்றியடைய உங்கள் ஆதரவை நாடி நிற்கின்றோம். மேற்படி எமது வலைத்திரட்டி முயற்சிகளை உங்கள் நட்புகளுடன் பகிர்ந்து, அவர்களையும் எமது வலைத்திரட்டியில் இணையச் செய்யுங்கள். எமது வலைத்திரட்டியில் உள்ள குறைகளைச் சுட்டிக் காட்டி, எமது வலைத்திரட்டியின் அடுத்த பதிப்பினைச் சிறந்த தளமாக வெளியிட உதவுங்கள்.

இவ்வண்ணம்

'ஊற்று' வலையுலக எழுத்தாளர்கள் மன்றம்

ஞாயிறு, 5 ஜூன், 2016

சித்திரை வருடப்பிறப்பு கவிதைப்போட்டியின் வெற்றியாளர்கள்.-2016

சித்திரை வருடப்பிறப்பை முன்னிட்டு சித்திரை மகளே வாராய் என்ற தலைப்பில் 100 க்கு மேற்பட்ட கவிஞர்கள் போட்டியில் பங்கு பற்றினார்கள்  ஒவ்வொரு கவிஞர்களும் படைத்த கவிதைகள் மிக அருமையாக உள்ளது இருந்தாலும் வெற்றியாளர்கள் தேவை அல்லவா அதில் இருந்து தரமான கவிதைகள் வடிகட்டப்பட்டது அந்த வெற்றியாளர்கள் விபரம் வருமாறு.

பல சிரமங்களுக்கு மத்தியில் நடுவராக இருந்து தமது கடமையை சிறப்பாக செய்து முடித்த நடுவர்களுக்கு எனது நன்றிகள் பல.

திரு.கவிஞர் ரமணி ஐயா
திரு. நா.பச்சைப்பாலன்ஐயா.
திரு.திண்டுக்கல் தனபாலன்
திரு .கா. யாழ்பாவாணன்

ஆகியோருக்கும் ஊற்று செயலாளர் மற்றும் உறுப்பினர்கள் அனைவருக்கும் ஊற்று அமைப்பாளர் என்ற அடிப்படையில் எனது நன்றியை கூற கடமைப்பட்டுள்ளேன்.

வெற்றி பெற்ற போட்டியாளர்கள் தங்களின் முகவரியை அனுப்புமாறு தாழ்மையாக வேண்டிக்கொள்கிறேன் பரிசுப்பொருட்கள் தபாலில் வந்து சேரும்.

ootru2@gmail.comஇந்த மின்னஞ்சலுக்கு தங்களின்முகவரியை அனுப்புமாறு வேண்டிக்கொள்கிறேன்

1ம் இடம் பெற்ற கவிதை.
சித்திரை மகளே, வாராய்!-1
1
சித்திரை மகளே, வாராய்! சீர்பல கொணர்ந்து சேர்ப்பாய்!
இத்தரை செழிக்கச் செய்வாய்! ஏழைகள் இடர்து டைப்பாய்!
நித்திரை விலக்கி வைப்பாய்! நீடிய பெருமை சேர்ப்பாய்!
முத்திரை பதித்துச் செல்வாய்! முன்னிலும் புதிதாய் வந்தே!
2
கார்முகில் மழையு குக்கக், காடெலாம் பசுமை பூண,
நீர்வளம் பெருகி ஓட, நீணிலம் விளைச்சல் கூட,
சீர்பட விலங்கி னங்கள் சிறக்க, வளமை சேர்க்க,
பார்வளம் பெருகப், பஞ்சம் பட்டினி ஒழிக்க வாராய்!
3
சோலையில் மலர்கள் பூக்கச், சூழவண் டினங்கள் பாட,
காலையில் குயில்கள் கூவக், கண்கவர் மயில்கள் ஆட,
மாலையில் மணக்கும் தென்றல் மட்டிலாக் குளுமை சேர்க்க,
ஓலையில் கிளிகள் ஊஞ்சல் உந்திட வருக, பாவாய்!
4
நாட்டினில் அமைதி காக்க, நல்லறம் தழைத்து நிற்க,
கூட்டமாய் இணைந்து மக்கள் கூடியே இனிது வாழ,
வாட்டிடும் வறுமை நீங்க, வாய்த்திடும் தொழில்கள் ஓங்க,
பூட்டிய விலங்கொ டிக்கப் பூவையே, மகிழ்ந்து வாராய்!
5
மக்களின் நலத்தை நாடும் மாநில அரசு வேண்டும்!
தக்கவர் அமைச்ச ராகித் தாழ்நிலை தவிர்க்க வேண்டும்!
திக்கெலாம் புகழ நீதி செய்திட நடுவர் வேண்டும்!
சிக்கலாய்ப் பெருகும் ஊழல் தீய்த்திட வருக, பாபாய்!


2ம் இடம் பெற்ற கவிதை


சித்திரை மகளே வாராய்!

சித்திரை மகளே வா வா! - உன்னை சிறம் தாழ்ந்து
கரம் பணிந்து வணங்குகின்றோம் வா வா!

கோடி பலன்கள் கொட்டித்தரும்
குணங்கள் பல கொண்ட ஆன்மீக 
மகளே (மாதமே) வா வா!

சொக்கநாதர் திருக்கல்யாணத்தையும்
சித்திரை மாத பௌணமியையும் கொண்ட
தமிழரின் முத்திரை மாத மகளே வா! வா!

அழகர் கோயில் சித்திரைத் திருவிழாவையும்
தஞ்சை பிரகதீஸ்வரர் திருக்கோயிலின்
திருவிழாவையும் - மேலும் பல்வேறு
திருதளங்களில் ஆராதனைளையும் அர்ச்சனைகளையு
தன்னகத்தே கொண்ட சித்திரை பாவையே வா! வா!

ஊர்கூடி தேர் இழுத்தது போல
உலகம் கூடி போற்றும் திருநாட்களை - உன்
அகத்தே உள்ளடக்கிக்கொண்டிருக்கும்
உன்னத கலைமகளே வா! வா!

பாவ புண்ணியத்தின்  கணக்கெழுதும்
சித்திர புத்திரனும்
தசரத சக்கரவர்த்தியின் தவபுதல்வன்
ராமபிரானும்
மதத்தில் புரட்சி செய்த மகான்
ஸ்ரீ ராமனுஜனும்
மகத்தான போதனைகளை உலகிற்கு வழங்கிய
மகவீராரும்
அவதரித்த சித்திரை மகளே வா! வா

இச்சித்திரை பிறக்கும் திருவழா
இத்திரையோர்களுக்கு பெருவிழா!
கைகூப்பி உனை வணங்குகின்றோம் வா! வா

3ம்இடம் பெற்ற கவிதை
சித்திரை மகளே வாராயா’3

சித்திரை மகளே வாராயா- எங்கள்
சித்திரை மகளே வாராயா...

பங்குனித் திங்கள் ஓடி மறைந்திட
பொங்கும் மங்களம் எங்கும் நிறைந்திட
தங்கத் தமிழ்மொழி ஓங்கி வளர்ந்திட
பாங்குடன் பண்பிணை போற்றி மகிழ்ந்திட

சித்திரை மகளே வாராயா- எங்கள்
சித்திரை மகளே வாராயா...

பசியும் பஞ்சமும் இல்லாதொழிந்திட
பகைவர் யாவரும் அன்புறவாடிட
பாசமும் நேசமும் அவனியில் நிலைத்திட
பொய்யும் புரட்டும் நமை விட்டோடிட

சித்திரை மகளே வாராயா- எங்கள்
சித்திரை மகளே வாராயா...

மாவிலைத் தோரணம் வாசலில் அசைந்திட
மாக்கோலம் அழகுடன் கண்களை கவர்ந்திட
மங்கள இன்னிசை எங்கும் முழங்கிட
மகிழ்வுடன் துன்முகி ஆண்டு பிறந்திட

சித்திரை மகளே வாராயா- எங்கள்
சித்திரை மகளே வாராயா...

-நன்றி-
-அன்புடன்-
-ஊற்று அமைப்பாளர்-
கவிஞர்.த.ரூபன்-